Шерзод Хўжаев қишда электр энергияси таъминотига чекловлар киритилишининг сабабини тушунтирди.
Маълум бўлишича, қиш ойларида электр таъминоти ўчишига генерация етишмаслиги сабаб бўлади.
«Генерация етмагандан кейин биз чекловлар киритишга мажбур бўламиз. Нимага? Чунки, агар чекловлар киритмасак, оддий тил билан айтганда тез-тез блэкаутар бўлиб туради. Яъни бир кичик авария каттага айланиб кетаверади.
Ҳозирги кундаги муаммо бу эмас. Қишда айнан генерация етишмаслиги туфайли қўл билан ўчириш юз беради. Ёзда шаҳарларда ‘свет ўчиши’нинг сабаби эса биринчидан шаҳарлардаги қурилишлар ҳисобланади. Сабаби 4 та ҳовлининг ўрнига битта кўп қаватли уй пайдо бўлаяпти. Унга ҳеч ким янги кабель олиб келмаяпти, янги нимстанция қурмаяпти.
Иккинчидан нимстанцияларда юкланганлик даражаси ўлчаняпти, 60 фоиз, аслида 50 фоиздан ошиши керак эмас. Чунки нимстанцияларда 2 та трансформатор туради, 50 фоиздан ошиб кетса трансформатор ҳамма юкламани кўтара олмайди. Биз яна битта кўп қаватли уй, савдо мажмуаси ёки меҳмонхона қурилса энди уларни бу нимстанцияларга улаб бўлмаслигини тушунишимиз керак. Яъни инфратузилма ҳар доим умумий қурилишлардан олдинда юриши керак», — дея таъкидлаган Шерзод Хўжаев.
Аввалроқ вазир ўринбосари бу лойиҳа сиёсий ёки иқтисодий эканига АЭСни қурдираётган мамлакат эмас, уни қураётган мамлакат баҳо беришини айтгани хабар қилинганди.
«Бу мен учун кўпроқ сиёсий, яъни менинг компаниям узоқ ёки қўшни мамлакатда бўлиши мен учун сиёсий жиҳатдан муҳим. Мен бирорта мамлакатни эшитмаганман: бошқа мамлакатга бориб, атом станциясини қурса, қандайдир сиёсий мақсадларни кўзламаса. Бу фақат Россия ёки Америка ё Хитой, Корея, Франция эмас, ҳамма жойда бир хил», — дейди у.
Аввалроқ электр таъминотини чеклаш бўйича Бухоро вилояти туманлар кесимида жадвал сурати тарқалгани ҳақида хабар қилган эдик.
