Ижтимоий тармоқларда АҚШдаги бир эркак акс этган видео кенг тарқалмоқда. Нашр муаллифлари ва фойдаланувчилар ушбу шахсни Қирғизистон Жогорку Кенешининг собиқ депутати Улукбек Кочкоров деб айтилмоқда.

Видеода эркак автомобил багажхонасига буюртма пакетларини жойлаштираётганини кўриш мумкин. Муаллифлар унинг АҚШдаги Amazon компаниясида курьер бўлиб ишлаётганини таъкидлаган.

Мазкур видео ижтимоий тармоқларда қизғин муҳокамаларга сабаб бўлди. Кўплаб фойдаланувчилар ҳар қандай ҳалол меҳнат ҳурматга лойиқ эканини таъкидлашган. Айримлар эса Кочкоровнинг сиёсий фаолияти ва Қирғизистондаги давлат лавозимларидаги меҳнатини эсга олган.

Очиқ манбаларга кўра, Улукбек Кочкоров Қирғизистон парламентининг V чақириқ депутати бўлиб, «Ата-Журт» партияси вакили сифатида фаолият юритган. У 2017 йилги президентлик сайловларида иштирок этган, 2018 йил октябрь ойида эса Қирғизистон меҳнат ва ижтимоий ривожланиш вазири этиб тайинланган.

2020 йилда у «Биримдик» партиясидан парламент депутатлигига номзодини қўйган. Шу йил октябрь ойидаги сиёсий воқеалардан сўнг вазирлик лавозимидан озод этилган.

Қатор нашрлар маълумотига кўра, Улукбек Кочкоров кейинги бир неча йилдан буён оиласи билан АҚШнинг Чикаго шаҳрида яшаб келмоқда. Бироқ у ҳозирги фаолияти ҳақида омма олдида расман изоҳ бермаган.

Шу билан бирга, собиқ депутатнинг ҳақиқатдан ҳам курьер сифатида ишлаётгани ҳақида расмий тасдиқланган маълумот мавжуд эмас.