Деҳли аэропортида икки ўзбекистонлик оғиз бўшлиғида тиш ва металл занжир кўринишида 951 грамм олтин яширганликда айбланиб қўлга олинди. Бу ҳақда India Today нашрига асосланиб «Газета.uz» хабар бермоқда.
Маълум қилинишича, 10 сентябрь куни Деҳли халқаро аэропортида икки нафар Ўзбекистон фуқаросининг оғиз бўшлиғидан 951 грамм олтин топилган ва тегишли органлар томонидан мусодара қилинган.
Қайд этилишича, иккала шахс Дубай рейси билан учиб келган вақтида қўлга олинган.
«Шунингдек, ўтган ойда ҳам икки нафар ўзбекистонлик Деҳлидаги Индира Ганди халқаро аэропортида қиймати 10 млн рупияга (тахминан 1,45 млрд сўм) тенг бўлган олтин қимматликларини ноқонуний ташишда гумонланиб, божхона ходимлари томонидан қўлга олинган эди», – дейилади хабарда.
