Umumiy holsizlik bir qator infeksion va noinfeksion kasalliklarning ham ilk belgisi bo‘lishi mumkin.
Bu haqda Respublika ixtisoslashtirilgan endokrinologiya ilmiy-amaliy tibbiyot markazi diabetologiya bo‘limi shifokori, tibbiyot fanlari nomzodi Feruza Tohirova ma’lum qildi.
«Yuqumsiz endokrin (qandli diabetning ikkinchi turi) va xavfli o‘sma kasalliklari, revmatizm, revmatoid artrit, tizimli qizil bo‘richa, kamqonlik, yurak qon-tomir kasalliklari shular jumlasidan.
Bemor hayotiga xavf soladigan qandli diabetning ikkinchi turi (qondagi qand miqdorining oshib ketishi) ko‘pincha 40 va undan katta yoshdagi kishilarda uchraydi. Bunga nasliy moyillik yoki noto‘g‘ri ovqatlanish, semizlik, kamxarakatlik, asabiy zo‘riqish kabilar sabab bo‘ladi.
U yashirin kechadi, lekin bosh miya, ko‘z tubi, yurak, buyrak, hamma yirik va mayda arterial qon-tomirlar shikastlanib boradi. Bu patologik jarayon yurak qon-tomir va buyrak yetishmovchiligiga olib keladi.
Surunkali В va S virusli gepatitlar (jigar kasalliklari) esa yuqumli kasallik bo‘lib, in’yeksiya orqali, qon quyishdan, homilador onadan bolaga yuqishi mumkin. Xastalik yashirin kechgani bilan bemorda kundan-kunga umumiy holsizlik oshib boradi.
Agar sizni umumiy holsizlik yoki surunkali charchash sindromi bezovta qilsa, darhol vrachga murojaat qiling. Tibbiy ko‘rik jarayonida shifokorlar umumiy holsizlik sabablarini aniqlashda yordam berad»,— deya ta’kidlaydi mutaxassis.
