Жорий йилнинг 07 октябрь куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида Бош прокуратура ҳузуридаги Мажбурий ижро бюроси раҳбарияти ҳамда масъул ходимлари билан “Бюро органлари фаолиятида амалга оширилаётган ислоҳотлар, татбиқ этилаётган янгиликлар ва ижро этишнинг муқобил усуллари” мавзусида матбуот анжумани бўлиб ўтди.
Тадбирда, Бюро директорининг биринчи ўринбосари Шавкат Хайдаров, Бюро марказий аппарати ҳамда Тошкент шаҳар бошқармаси ходимлари, шунингдек Миллий телерадиокомпания, Миллий ахборот агентлиги ҳамда журналист, блогерлар иштирок этишди.
Таъкидлаш жоизки, мамлакатимизда суд ҳужжатлари ва бошқа органлар ҳужжатларини ижро этиш тизимини такомиллаштириш, фуқаро-лар, тадбиркорларнинг ҳуқуқ ҳамда қонуний манфаатларини ишончли ҳимоя қилиш бўйича кенг кўламли чора — тадбирлар амалга оширилмоқда.
Олиб борилаётган ислоҳотлар аввало инсон манфаати учун қаратилган.
Бюро органлари томонидан ўтган даврда жами 21,8 трлн. сўмлик ундирувлар амалга оширилиб, амалда бу кўрсатгич ўтган йилнинг шу даврига нисбатан 3,7 трлн сўмга ошган.
Биргина, давлат фойдасига 8,5 трлн сўм, тадбиркорлик ва бошқа субъектлари фойдасига 6 трлн. сўм, банкларга 5,8 трлн. сўм ва фуқароларимиз манфаатлари учун 1,4 трлн. сўмдан ортиқ ундирувлар амалга оширилди.
Жорий йилнинг 1 июнь кунидан ишга туширилган ахборот технологиялари ёрдамида муқобил равишда ва масофавий ишлайдиган 15 та туманлараро бўлимлари томонидан мажбурий ижро ҳаракатлари амалга оширилмасдан ҳамда фуқароларнинг мол-мулкларига даҳл қилмасдан 300 мингга яқин ҳужжатларнинг ижроси амалда таъминланди.
Ижтимоий аҳамиятга эга бўлган ижро ҳужжатлари бўйича тизимли ишлар амалга оширилмоқда.
Масалан, Давлатимиз раҳбарининг тегишли Фармони билан эҳтиёжманд фуқароларни қўллаб-қувватлар учун жорий этилган “Темир дафтар”, “Аёллар дафтари” ва “Ёшлар дафтари”га 416,4 млрд сўм ёки ўтган йилнинг мос даврига нисбатан 69,1 млрд. сўм кўп маблағ йўналтирилди.
Моддий ёрдамга муҳтож фарзандлар фойдасига 1 трлн. сўмдан ортиқ алимент пуллари ундирилди, шундан 9,2 млрд. сўмлик 61 та уй-жой ва 636,6 млн. сўмлик 8 та транспорт воситаси алимент олувчиларга олдиндан тўлов сифатида берилиши таъминланди.
Шунингдек, вояга етмаган фарзандини моддий таъминлашдан бўйин товлаганлик учун жиноий жавобгарликка тортилган қарздорларнинг 130 нафар ундирувчиларига “Алимент тўловлари” давлат мақсадли жамғармаси ҳисобидан 1,5 млрд. сўм пул маблағи тўлаб берилди ва алимент тўловлари бўйича ундирув ўтган йилнинг шу даврига нисбатан 578 млрд. сўмга ошди.
Таъкидлаш жоизки, 20 мингга яқин ишсиз алимент тўловчилар ишга жойлаштирилди, 41 мингдан ортиқ оилаларни яраштиришга эришилди.
Қонунга хилоф равишда ишдан бўшатилган 925 нафар шахс ишга тикланди, тўланмай қолган 61 млрд. сўмлик иш ҳақлари ундирилди.
Бюро органлари фаолиятига ахборот-коммуникация технологияларини жорий этиш ишлари янада жадалаштирилиб борилмоқда.
Давлат ижрочисига ижро ҳужжатларни қабул қилиш, қарздорларни идентификация қилиш, мол-мулкини аниқлаш, қарорлар қабул қилишга кўмаклашувчи “Smart ёрдамчи” платформаси ишга туширилган.
Давлат ижрочиларининг автотранспорт воситаларига нисбатан қидирув эълон қилиш ҳақидаги қарорларини Йўл ҳаракати хавфсизлиги органларига “МIB-Portal” дастури орқали электрон тарзда юбориш имконияти яратилди.
Алимент мажбуриятларини бажаришдан бўйин товлаб келаётган ва қидирувдаги 3 мингдан ортиқ қарздорлар ҳақидаги маълумотлар Бюронинг веб-сайтига жойлаштирилди.
Бюро органлари фаолиятига оид барча очиқ маълумотлар “Ўзбекистон Республикаси очиқ маълумотлар портали” ҳамда www.mib.uz расмий сайтининг “Очиқ маълумотлар” номли саҳифасига жойлаштирилиб борилмоқда.
Бундан ташқари, Тошкент Халқаро Aэропортида — фуқароларимизда қарздорлик сабабли юзага келган тақиқлар масаласига аниқлик киритиш ва уларни ечиш, шунингдек электрон тўлов тизимлари орқали қарздорликларни бартараф этиш мақсадида, Мажбурий ижро бюросининг махсус интерактив хизматлар шаҳобчаси ташкил қилинди.
Ҳозирда, фуқаролар ўзлари яшаб келаётган ҳудудлардаги Бюронинг исталган ҳудудий бошқарма ёки бўлимларидан ҳар ҳафтанинг шанба куни “Online — video” орқали Бюро раҳбариятига мурожаат қолдиришмоқда.
