Суриянинг Манбиж шаҳрида 4 февраль куни кучли портлаш содир бўлди: террорчи ишчиларни олиб кетаётган машина ёнида миналанган автомобилни портлатиб юборди. Ҳужум оқибатида 15 киши ҳалок бўлди, яна 15 киши оғир яраланди. Қурбонларнинг аксарияти аёллардир.
Портлаш 2024 йил декабрь ойида “Озодлик тонги” операцияси давомида PKK/YPG террорчиларидан озод қилинган Манбижнинг жанубий кириш қисмида содир бўлган. Маҳаллий ҳокимият маълумотларига кўра, ҳужум учун жавобгарликни ҳозирча ҳеч бир гуруҳ ўз зиммасига олмаган, бироқ PKK/YPG жанггариларининг алоқадорлиги тахмини кўриб чиқилмоқда.
Ярадорлар яқин атрофдаги шифохоналарга етказилган, шифокорларнинг сўзларига кўра, қурбонлар сони ортиши мумкин.
Бу сўнгги вақтларда Манбижда содир этилган биринчи теракт эмас. Шанба куни шаҳар марказида содир бўлган портлаш оқибатида тўрт киши ҳалок бўлди, яна тўққиз киши яраланди. 2024 йил декабрь ойи охиридан буён ушбу ҳудудда содир этилган еттита ҳужум натижасида 28 нафар тинч аҳоли, жумладан, аёллар ва болалар ҳалок бўлиб, яна 45 киши жароҳатланган.
Сурия миллий армияси (СМА) кучларининг Манбиж озод қилинганидан кейин хавфсизликни таъминлаш бўйича саъй-ҳаракатларига қарамай, минтақага террорчилик фаоллиги кучаймоқда.
