Бухоро вилоят суди биносида 28 ноябрь куни 22 нафар судланувчига оид жиноят ишини кўриб чиқиш бўйича очиқ суд жараёни бошланди, деб хабар беради Олий суд матбуот хизмати.
Ушбу жиноят иши Қорақалпоғистон Республикаси судининг жиноят ишлари бўйича судлов ҳайъати судьяси Е. Абибуллаев раислигида биринчи инстанция судида кўриб чиқилмоқда.
Дастлабки тергов органининг айблов хулосасига кўра судланувчилар:
Даулетмурат Тажимуратов (1979 йилда туғилган, Ўзбекистон Республикаси фуқароси, миллати – қорақалпоқ, «Ел хызметинде» адвокатлик бюроси адвокати, илгари «Ел хизметинде» газетаси бош муҳаррири бўлиб ишлаган) Жиноят кодексининг 28,104-моддаси (иштирокчиликда қасддан баданга оғир шикаст етказиш) 3-қисми «а» банди, 159-моддаси (Ўзбекистон Республикасининг конституциявий тузумига тажовуз қилиш) 4-қисми, 167-моддаси (ўзлаштириш ёки растрата йўли билан талон-торож қилиш) 3-қисми «а» банди, 243-моддаси (жиноий фаолиятдан олинган даромадларни легаллаштириш), 244-моддаси (оммавий тартибсизликлар) 3-қисми ва 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «а», «б», «г» бандларида;
Лолагул Каллиханова (1989 йилда туғилган, Ўзбекистон фуқароси, миллати – қорақалпоқ, Макан интернет-нашри маъмури) Жиноят кодексининг 28,104-моддаси 3-қисми «а» банди, 159-моддаси 4-қисми, 244-моддаси 3-қисми ва 244-1-моддаси 3-қисми «а», «б», «г» бандларида;
Азамат Турданов (1984 йилда туғилган, Ўзбекистон фуқароси, миллати – қорақалпоқ, Нукус олимпия захиралари коллежи директори) Жиноят кодексининг 28,104-моддаси 3-қисми «а» банди, 159-моддаси 4-қисми ва 244-моддаси 3-қисмида;
Ахмет Сметуллаев (1993 йилда туғилган, Ўзбекистон фуқароси, миллати – қорақалпоқ, Чимбой туманидаги болалар ва ўсмирлар спорт мактаби мураббийси) Жиноят кодексининг 28,104-моддаси 3-қисми «а» банди, 159-моддаси 4-қисми ва 244-моддаси 3-қисмида;
Даўлетмурат Джиемуратов (1984 йилда туғилган, Ўзбекистон фуқароси, миллати – қорақалпоқ, «Қораўзак Саҳиб» МЧЖ директори) Жиноят кодексининг 28,104-моддаси 3-қисми «а» банди, 159-моддаси 4-қисми ва 244-моддаси 3-қисмида;
Бахтияр Кадирбергенов (1986 йилда туғилган, Ўзбекистон фуқароси, миллати – қорақалпоқ, «Аяма» веб-сайти маъмури, блогер) Жиноят кодексининг 244-моддаси 3-қисми ва 277-моддаси (безорилик) 3-қисми «г» бандида;
Байрам Сейтниязов (1967 йилда туғилган, Ўзбекистон фуқароси, миллати – қорақалпоқ, ишсиз) Жиноят кодексининг 244-моддаси 3-қисми ва 244-1-моддаси 3-қисми «а», «г» бандларида;
Аллабай Тоқимбетов (1973 йилда туғилган, Ўзбекистон фуқароси, миллати – қорақалпоқ, норасмий тарзда имомлик билан шуғулланган) Жиноят кодексининг 244-моддаси 3-қисмида;
Қаҳарман Сейтимов (1972 йилда туғилган, Ўзбекистон фуқароси, миллати – қорақалпоқ, тадбиркор) Жиноят кодексининг 244-моддаси 3-қисмида;
Азамат Нуратдинов (1989 йилда туғилган, Ўзбекистон фуқароси, миллати – қорақалпоқ, Мўйноқ туманидаги 9-мактаб ўқитувчиси, блогер) Жиноят кодексининг 244-моддаси 3-қисми ва 244-1-моддаси 3-қисми «а», «г» бандларида;
Сейдабулла Медетов (1989 йилда туғилган, Ўзбекистон фуқароси, миллати – қозоқ, «Келешек ушун» фермер хўжалиги раҳбари) Жиноят кодексининг 244-моддаси 3-қисми ва 244-1-моддаси 3-қисми «а», «г» бандларида;
Нурлан Найипов (1968 йилда туғилган, Ўзбекистон фуқароси, миллати – қозоқ, нафақахўр) Жиноят кодексининг 244-моддаси 3-қисми ва 244-1-моддаси 3-қисми «г» бандида;
Полат Шамшетов (1977 йилда туғилган, Ўзбекистон Республикаси фуқароси, миллати – қорақалпоқ, Қорақалпоғистон Республикаси Ички ишлар вазирлиги Жиноят қидирув бошқармаси бўлими бошлиғи) Жиноят кодексининг 244-моддаси 3-қисмида;
Разбек Бекмуратов (1992 йилда туғилган, Ўзбекистон фуқароси, миллати – қорақалпоқ, Қорақалпоғистон Республикаси Давлат университети ўқитувчиси) Жиноят кодексининг 104-моддаси (қасддан баданга оғир шикаст етказиш) 3-қисми «а» банди, 244-моддаси 3-қисми ва 247-моддаси (ўқотар қуролни, ўқ-дориларни, ўқотар қуролнинг асосий қисмларини, портловчи моддаларни, портлатиш воситаларини ёки портлатиш қурилмаларини қонунга хилоф равишда эгаллаш) 3-қисми «а» бандида;
Султанбек Каипов (1992 йилда туғилган, Ўзбекистон фуқароси, миллати – қорақалпоқ, ишсиз) Жиноят кодексининг 104-моддаси 3-қисми «а» банди, 244-моддаси 3-қисми ва 244-1-моддаси 3-қисми «а» бандида;
Бердах Генжебаев (1996 йилда туғилган, Ўзбекистон фуқароси, миллати – қорақалпоқ, ишсиз) Жиноят кодексининг 164-моддаси (босқинчилик) 2-қисми «б» банди, 244-моддаси 3-қисми ва 227-моддаси (ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 2-қисми «а» бандида;
Саламат Калилаев (1976 йилда туғилган, Ўзбекистон фуқароси, миллати – қорақалпоқ, ишсиз) Жиноят кодексининг 244-моддаси 3-қисмида;
Полат Нурниязов (1986 йилда туғилган, Ўзбекистон фуқароси, миллати – қорақалпоқ, «Сада-Марс» МЧЖ омбор мудири) Жиноят кодексининг 244-моддаси 3-қисмида;
Саиипназар Калимов (1980 йилда туғилган, Ўзбекистон фуқароси, миллати – қорақалпоқ, ЯТМФ билан шуғулланади) Жиноят кодексининг 244-моддаси 3-қисмида;
Нурлан Султамуратов (1998 йилда туғилган, Ўзбекистон фуқароси, миллати – қорақалпоқ, ёлланма ишчи) Жиноят кодексининг 244-моддаси 3-қисмида;
Арислан Темирханов (1986 йилда туғилган, Ўзбекистон фуқароси, миллати – қорақалпоқ, «Устюрт геофизика» корхонаси қўриқчиси) Жиноят кодексининг 244-моддаси 3-қисмида;
Амирбек Адилбеков (1993 йилда туғилган, Ўзбекистон фуқароси, миллати – қорақалпоқ, суғурта компанияси мутахассиси) Жиноят кодексининг 244-моддаси 3-қисмида назарда тутилган жиноятларни содир этганликда айбланмоқда.
20 нафар судланувчига нисбатан «қамоққа олиш», 1 нафарига «уй қамоғи» ва 1 нафарига «жамоа кафиллиги» тарзидаги эҳтиёт чоралари қўлланилган.
Эслатиб ўтамиз, Қорақалпоғистоннинг Нукус шаҳрида 1 июль куни соат тахминан 15:00 дан бошлаб айрим фуқаролар шаҳар Марказий деҳқон бозорида тўпланиб, намойишлар уюштирганди. Қорақалпоғистон Жўқорғи Кенгеси 2 июль куни мазкур ҳолат юзасидан расмий баёнот берди. Унга кўра, популистик шиорларни ниқоб қилиб олиб, фуқароларнинг онги ва ишончини манипуляция қилиб, тартибсизликлар ташкилотчилари ҳокимият вакилларининг қонуний талабаларига бўйсунмай, республика фуқароларини Қорақалпоғистон Республикасининг маъмурий бинолари олдидаги майдонга йиғган.
Шундан сўнг Шавкат Мирзиёев 2 июль куни Нукусга етиб борди. Президент у ерда Жўқорғи Кенгес депутатлари, Қорақалпоғистон фахрийлари ва фаоллари билан учрашув ўтказди. Давлат раҳбари унда Ўзбекистон Конституциясининг 70, 71, 72, 74, 75-моддаларини амалдаги таҳрирда ўзгаришсиз қолдириш зарурлигини таъкидлаган.
Қорақалпоғистонда 3 июлдан 2 августгача фавқулодда ҳолат эълон қилинди. Миллий гвардия қўмондони Рустам Жўраев Қорақалпоғистон Республикаси коменданти этиб тайинланди. Ҳудудга кириш ва чиқиш чекланган. Барча оммавий тадбирлар тақиқланган.
Шунингдек, ҳудудга Ўзбекистон Мудофаа вазирлигининг куч ва воситалари жалб этилган. Вазирлар Маҳкамаси маҳкаманинг захира фонди ва бошқа давлат манбаларидан фавқулодда ҳолат режимини таъминлаш учун зарур маблағларни ажратиши белгиланганди.
