ФИФА 2026 йилги жаҳон чемпионати олдидан бир қатор янги қоидаларни жорий этишга қарор қилди. The Touchline нашри хабарига кўра, ушбу янгиликлар ўйин суръатини ошириш, вақт чўзиш ҳолатларини камайтириш ва ҳакамлик қарорларини янада аниқлаштиришга қаратилган.

Янги тартибга мувофиқ, алмаштирилаётган футболчи майдонни тарк этиши учун 10 сония вақт берилади. Агар у бу жараённи атайлаб чўзса, унинг ўрнига тушадиган ўйинчи фақат 1 дақиқадан кейин майдонга кириши мумкин бўлади.

Шунингдек, аут ташлаш ва дарвозадан тўпни ўйинга киритиш учун ҳам 5 сониялик чеклов белгиланмоқда. Агар футболчи белгиланган вақтда тўпни ўйинга киритмаса, бу ҳуқуқ рақиб жамоага ўтади.

Тиббий ёрдам бўйича ҳам янги тартиб жорий этилмоқда. Энди майдонда ёрдам олган футболчи 1 дақиқага майдонни тарк этишига тўғри келади. Бироқ, агар унга нисбатан ишлатилган қўполлик учун рақибга карточка кўрсатилган бўлса, ушбу қоида татбиқ этилмайди.

VAR ваколатлари ҳам кенгайтирилади. Эндиликда видеоассистент иккинчи сариқ карточка ҳолатлари ва хато белгиланган бурчак тўпларини ҳам текшириш ҳуқуқига эга бўлади.

Яна бир муҳим ўзгаришга кўра, ҳакам билан фақат жамоа сардори мулоқот қилиши мумкин. Бошқа футболчиларнинг ҳакамга эътироз билдириши ёки мулоқот қилишга уриниши эса сариқ карточка билан жазоланиши мумкин.