Туркияда йирик миқдордаги фирибгарликда айбланиб, халқаро қидирувга берилган икки Ўзбекистон фуқароси қўлга олиниб, Ўзбекистон томонига топширилди.

Ўзбекистоннинг Истанбулдаги Бош консуллиги маълумотларига кўра, гумонланувчилар Хоразм вилоятида туғилган 40 ёшли ва Тошкент шаҳрида яшовчи 38 ёшли фуқародир. Улар жиноятларни содир этгандан сўнг, мамлакатни тарк этиб, хорижда яшириниб юришган.

Иккала мамлакат ҳуқуқни муҳофаза қилиш органларининг мувофиқлаштирилган саъй-ҳаракатлари натижасида уларнинг жойлашуви аниқланиб, ҳибсга олинган. Белгиланган процессуал тартиб-қоидаларга мувофиқ, гумондорлар жиноий жавобгарликка тортилиш учун Ўзбекистонга экстрадиция қилинган.

Дипломатик миссия Ўзбекистон ва Туркия ҳуқуқни муҳофаза қилиш органлари ўртасидаги ҳамкорлик изчил мустаҳкамланиб бораётганини, бу эса қочқинларни самарали қидириш ва ҳибсга олишга ёрдам бераётганини таъкидлаган.

Ҳозирда жиноятлари учун қидирувда ва мамлакат ташқарисида бўлган бошқа фуқароларни аниқлаш ва қайтариш бўйича ишлар давом этмоқда.