Ўзбекистон 2026 йил февралда дунё бўйича йирик олтин харидорларидан бири бўлди. Бу ҳақда Жаҳон олтин кенгаши маълум қилди.

Февралда энг кўп олтинни Польша Марказий банки сотиб олган — 20 тонна. Кейинги ўринни 8 тонналик харид билан Ўзбекистон эгаллаган. Ўз навбатида Чехия (2 тонна), Малайзия (2 тонна), Хитой (1 тонна) ва Камбоджа (1 тонна) ҳам олтин харидини амалга оширган.

Таҳлил қилинишича, Ўзбекистон Марказий банки февралда сотиб олган қимматбаҳо металл ҳисобига мамлакат олтин захиралари ҳажми 407 тоннага етган. Тиллалар қиймати республика умумий олтин-валюта захираларининг 88 фоизига тенг, дейилади таҳлилда. Кенгаш мамлакат кетма-кет беш ойдан бери олтин сотиб олаётганини алоҳида таъкидланган.

Ўзбекистонда иккита йирик корхона — Навоий ва Олмалиқ кон металлургия комбинатлари олтин қазиб олади. Марказий банк улардан олтинларни сотиб олувчи ягона харидор ва эксклюзив ҳуқуқ эгаси ҳисобланади.

Охирги йилларда мамлакат экспорти тушумларининг қарийб учдан бир қисми олтин сотувидан келмоқда. Масалан, 2025 йилда республика тарихда кузатилмаган юқори қиймат — 9,9 миллиард долларлик олтин экспорт қилди. Ўтган йили Навоий кон металлургия комбинатининг ўзи 98,1 тонна олтин қазиб олган. Бунинг умумий қиймати 135,6 триллион сўмни (11,3 миллиард доллар) ташкил этган.

Яқинда Ўзбекистон олтин захиралари ҳажми бўйича дунёда 14-ўринни эгаллагани хабар қилинганди. 2026 йил 1 март ҳолатига кўра, мамлакат олтин-валюта захиралари тарихда илк бор 77 миллиард доллардан ошган. Мазкур қийматнинг қарийб 67,8 миллиард доллари олтин баҳоси ҳисобига шаклланган.