Ўзбекистон Республикаси Ташқи ишлар вазирлиги Покистон раҳбарияти воситачилигида Яқин Шарқда ўт очишни тўлиқ тўхтатиш ва сулҳ ўрнатилгани ҳақидаги эълонни олқишлади.

Вазирлик баёнотида мазкур ташаббус минтақадаги кескинликни юмшатиш йўлида муҳим қадам экани таъкидланган. Қайд этилишича, ушбу саъй-ҳаракатлар сиёсий-дипломатик мулоқотни фаоллаштириш ҳамда томонлар учун ўзаро мақбул ечимларни топишга замин яратади.

Шунингдек, барча томонлар вазминликка чақирилиб, вазиятни янада кескинлаштириши мумкин бўлган ҳаракатлардан тийилиш зарурлиги урғуланган.

Ўзбекистон томони тинчлик ва барқарорликка эришиш йўлида конструктив ҳамкорликни давом эттириш муҳимлигини қайд этди. Баёнотда, шунингдек, можароларни фақат тинч йўл билан, БМТ Низоми тамойилларига қатъий риоя қилган ҳолда ҳал этиш зарурлиги яна бир бор таъкидланган.