Самарқанд вилоятида биринчи синф ўқувчиларини урган аёлга нисбатан маъмурий иш судга юборилди. Бу ҳақда «Замон» ахборот дастурида хабар берилди.

Ҳодиса 3 апрель куни Қўшработ туманидаги 53-мактабда содир бўлган. Манбага кўра, ўқувчилар ўртасидаги низодан сўнг, болалардан бирининг онаси 6 апрель куни мактабга келиб, синф олдида жанжал чиқарган ва бир неча ўқувчига қўл кўтарган.

Ўқитувчининг айтишича, вазиятни муҳокама қилиш учун болаларнинг ота-оналари мактабга чақирилган. Суҳбатдан сўнг аёл болалар турган синфхонага кирган ва можаро жисмоний тўқнашувга айланган.

Аёл ўз ҳаракатларини тан олиб, ҳиссиётга берилиб иш тутганини ва содир бўлган воқеадан афсусда эканини билдирган.

Туман ички ишлар бўлими маълумотига кўра, уч нафар вояга етмаган болаларнинг ота-онасига нисбатан Маъмурий жавобгарлик тўғрисидаги кодекснинг 47-моддаси (болаларни тарбиялаш ва ўқитиш мажбуриятларини бажармаслик) бўйича баённома расмийлаштирилган. Аёлга эса 52-модда (енгил тан жароҳати етказиш) асосида баённома тузилган. Иш материаллари қарор қабул қилиш учун судга юборилган.