Тошкент халқаро аэропортида бегона сумкани олиб ўтишга рози бўлган йўловчи синтетик гиёҳвандлик воситалари билан қўлга олинди.
Божхона қўмитаси маълумотига кўра, Истанбул – Тошкент рейси билан учиб келган фуқаронинг юклари текширилганда, ерёнғоқ солинган ўрам ичига яширилган 598 дона таблетка кўринишидаги синтетик наркотик аниқланган.
Текширув давомида маълум бўлишича, йўловчи Туркияда нотаниш шахснинг сумкасини 35 доллар эвазига Тошкентга олиб келишга рози бўлган.
Ҳозирда мазкур ҳолат юзасидан тегишли тартибда суриштирув ишлари олиб борилмоқда.
Божхона қўмитаси фуқароларни бегона шахсларга тегишли юкларни олиб ўтмасликка чақириб, бу каби ҳолатлар жиддий ҳуқуқий жавобгарликка сабаб бўлишини эслатди.
Сўнгги янгиликлар