Тошкент халқаро аэропортида божхона ходимлари томонидан синтетик наркотик моддаларни биологик фаол қўшимча кўринишида олиб киришга уриниш ҳолати фош этилди.

Маълум қилинишича, "яшил" йўлак орқали ҳаракатланган қўшни давлат фуқаросининг юки текширилганда, спортчилар учун мўлжалланган 2 қути биологик фаол қўшимча божхоначилар эътиборини тортди.

Текширув давомида мазкур қутидаги капсулалар заводда ишлаб чиқарилган ҳолатдан фарқ қилиши аниқланди. Яъни, одатда оқ рангда бўлиши лозим бўлган капсулалар сариқ ва қизил рангда бўлиб, умумий сони 760 дона ўрнига 920 донани ташкил этгани маълум бўлди. Бу эса улар қўлбола тарзда қайта қaдoқланганини кўрсатади.

Экспертиза хулосасига кўра, капсулалар ичидаги модда "Alfa PVP" туридаги синтетик наркотик экани тасдиқланди. Ушбу гиёҳвандлик воситаларининг қора бозордаги қиймати 350 минг долларгача баҳоланмоқда.

Шунингдек, тезкор тадбирлар давомида ушбу шахс томонидан наркотик моддаларни "закладка" усулида тарқатиш учун яшириб кетилган манзил ҳам аниқланди. Юқоричирчиқ туманидаги ушбу жой кўздан кечирилганда, полимер пакет ичига жойланган, тахминан ярим килограмм оғирликдаги "гашиш" моддаси топилди.