2026 йилнинг биринчи чораги якунларига кўра, Ўзбекистон банк тизимининг жами активлари 932,3 трлн сўмни (76,3 млрд доллар), мажбуриятлари эса 793,9 трлн сўмни (64,9 млрд доллар) ташкил этди. Бу ҳақда Иқтисодий тадқиқотлар ва ислоҳотлар маркази томонидан тақдим этилган “Банклар фаоллик индекси”да қайд этилди.

Тадқиқотга кўра, кредит қўйилмалари 14 фоизга, депозитлар эса 32 фоизга ошган. Соф фойда кўрсаткичи ўтган йилнинг мос даврига нисбатан 36,3 фоизга ўсиб, 3,1 трлн сўмга (254 млн доллар) етган. Муаммоли кредитлар (НПЛ) улуши 4,5 фоиздан 3,3 фоизгача камайган.

Йирик банклар рейтинги

Йирик банклар сегментида Капитал банк ўз етакчилигини сақлаб қолган ҳолда 1-ўринни эгаллаб турибди. Умуман олганда, ушбу гуруҳдаги 20 та банкдан 7 таси ўз ўрнини яхшилаган, 8 таси пастлаган ва 5 таси аввалги мавқеини сақлаган. Энг юқори ўсишни Tenge банк намойиш этган — у 6 поғонага юқорилаб, умумий рейтингда 10-ўринга чиқиб олган.

Шунингдек, Ҳамкор банк, Азия Альянс банк ва Ипак йўли банк 1 поғонадан, Халқ банки, Инвест финанс банк ва Агробанк эса 2 поғонадан юқорилаган. Қолганлардан фарқли Ориент финанс банк 5 поғонага, Траст банк эса 3 поғонага пастлаган. Алоҳида индикаторлар бўйича йирик банклар ўртасидаги етакчилар қуйидагича тақсимланади:

• Молиявий воситачилик: Инвест финанс банк (1-ўрин), Анор банк (2-ўрин) ва Капитал банк (3-ўрин) етакчилик қилди.
• Молиявий оммабоплик: Агробанк (1-ўрин), Анор банк (2-ўрин) ва БРБ (3-ўрин) энг яхши натижаларни кўрсатди.
• Капитал етарлилиги: Ориент финанс банк (1-ўрин), Траст банк (2-ўрин) ва Халқ банки (3-ўрин) юқори кўрсаткичларга эга.
• Активлар сифати: Ҳамкор банк (1-ўрин), Азия Альянс банк (2-ўрин) ва Ипак йўли банк (3-ўрин) етакчи бўлди.
• Бошқарув самарадорлиги: Ўзсаноатқурилишбанк (1-ўрин), Ориент финанс банк (2-ўрин) ва Ўзмиллийбанк (3-ўрин) юқори ўринларни эгаллади.
• Даромад олиш салоҳияти: Ҳамкор банк (1-ўрин), Траст банк (2-ўрин) ва Азия Альянс банк (3-ўрин) олдинги қаторларда.
• Ликвидлилик: Азия Альянс банк (1-ўрин), Ипак йўли банк (2-ўрин) ва Траст банк (3-ўрин) энг яхши кўрсаткичларга эга.

Кичик банклар рейтинги

Кичик банклар гуруҳида ҳам рақобат фаоллашган. Ушбу гуруҳдаги 14 та банкдан 8 таси ўз позициясини яхшилашга муваффақ бўлганини кўриш мумкин. Рейтинг етакчиси сифатида 1 поғона юқорилаган TBS банк қайд этилди. Энг сезиларли ўсишни AVO банк ва Апекс банк намойиш этган, уларнинг ҳар иккаласи ўз ўрнини 3 поғонага яхшилаган.

Бундан ташқари, Soderot банк, Garant банк ва Ziraat банк 2 поғонадан, Open банк ва Uzum банк эса 1 поғонадан юқорилаган. Шу билан бирга, Октобанк рейтингда энг катта пасайишни қайд этиб, 6 поғонага тушиб кетган.

Маълумот учун, тадқиқот республикада фаолият юритаётган 34 та тижорат банкини қамраб олган бўлиб, уларнинг 20 таси йирик, 14 таси эса кичик банклар тоифасига киритилган. Индекс 27 та турли кўрсаткич, жумладан, Базел қўмитаси талаблари асосида шакллантирилган.