«Oʻzbekneftgaz» акциядорлик жамияти бошқаруви раисининг биринчи ўринбосари Суҳроб Ҳамроев компания 2008−2010 йилларда Тошкентнинг «Бунёдкор» жамоасида ўйнаган бразилиялик футболчи Ривалдо олдидаги қарзни тўламаслигини айтди. Унинг сўзларига кўра, қарзни тўлаш компаниянинг эмас, балки клубнинг мажбурияти ҳисобланади.

2024 йил апрель ойида «Бунёдкор» бразилиялик футболчилар Ривалдо ва Денилсон билан қарзни тўлаш бўйича келишувга эришган эди. Жамоа ушбу қарзни тўлаш масаласини клуб ҳомийси, яъни ўша пайтдаги «Oʻzbekneftgaz» ҳал қилишини маълум қилганди. Таъкидланишича, 9,2 миллион евро миқдоридаги қарз клубнинг 2−3 йиллик бюджетини ташкил этади.