Uzbekistan Airports компанияси Ислом Каримов номидаги "Тошкент" халқаро аэропорти ҳудудидаги автотураргоҳларни ижарага олиш ҳуқуқи учун E-auksion.uz электрон майдончасига лот қўйди.

Гап умумий майдони 40 минг квадрат метрдан ортиқ бўлган олтита автотураргоҳ (P1, P3, P4, P5, P7, P8) ҳақида кетмоқда, бу жами 1,5 мингга яқин машина ўрнини ташкил этади.

Автотураргоҳлар ҳудуди 3 йил муддатга ижарага берилади ва инфратузилмани тўлиқ ривожлантиришни назарда тутади.

"Лойиҳа йўловчилар учун қулайликни оширишга қаратилган: рақамли навигация, бўш жойлар мавжудлиги ҳақидаги табло, қўшимча тўлов усуллари ва электромобиллар учун қувватлаш станциялари пайдо бўлади. Бўлажак оператор автотураргоҳларни туну кун эксплуатация қилиш, уларга хизмат кўрсатиш ва қўриқлаш, шунингдек, реконструкция, кенгайтириш ва ободонлаштиришга сармоя киритишни ўз зиммасига олади," - дейилади хабарда.

Асосий талаб тўлиқ рақамлаштиришдир: автоматлаштирилган бошқарув тизимини жорий этиш, рақамларни аниқлаш, шлагбаумлар ўрнатиш, қулай тўлов усулларини (шу жумладан онлайн) таклиф этиш, шунингдек, жойларни бронь қилиш имкониятига эга мобил хизматни ишга тушириш.

Ижара тўлови қатъий белгиланган қисмдан (кимошди савдосида аниқланади) ва ўзгарувчан қисмдан - тушумнинг 5 фоизидан иборат бўлади. Шу билан бирга, оператор ҳисоботлар ва ҳисоб тизимларига кириш имкониятини тақдим этиш орқали ишнинг шаффофлигини таъминлаши шарт.

Ижарачиларга қўйиладиган барча талаблар ва иштирок этиш қоидалари E-auksion веб-сайтида ушбу лот остида батафсил жойлаштирилган.

Аукцион қоидаларига мувофиқ бошланғич суммалар савдолар давомида камида 5%га оширилиши мумкин. Лотнинг бошланғич қиймати - йилига 48 778 800 000 сўм. Аукцион 2026 йил 19 майга белгиланган.