Нидерландияда MV Hondius круиз лайнеридан эвакуация қилинган яна бир йўловчида хантавирус инфекцияси аниқланди. Бу ҳақда Лейден университети ҳузуридаги тиббиёт маркази (LUMC) маълум қилди.

Қайд этилишича, беморга айни пайтда зарур тиббий ёрдам кўрсатилмоқда ва у доимий шифокорлар назоратида бўлиб турибди.

Бундан аввал Нидерландиянинг Неймеген шаҳрида жойлашган Radboudumc клиникаси ҳам ушбу лайнердан эвакуация қилинган йўловчилардан бирида хантавирус тасдиқланганини хабар қилган эди.

Маълумотларга кўра, MV Hondius кемасидан Нидерландияга махсус тиббий рейслар орқали жами уч нафар зарарланган йўловчи олиб келинган. Улар Нидерландия, Германия ва Буюк Британия фуқароларидир.

Жаҳон соғлиқни сақлаш ташкилотининг маълум қилишича, Аргентинадан Кабо-Вердега йўл олган мазкур круиз лайнерида жами етти кишида хантавирус тасдиқланган. Афсуски, ҳозирга қадар уч нафар бемор вафот этган, яна бир нафари Жанубий Африка Республикасидаги шифохоналарнинг бирида жонлантириш бўлимида қолмоқда.