Антарктидадаги шельф музликлари олимлар кутганидан ҳам тезроқ эриши мумкин. Бу ҳақда “Nature Communications” журналида эълон қилинган янги тадқиқотда сўз боради.

Тадқиқот муаллифларидан бири Цинь Чжоунинг таъкидлашича, бу жараённинг энг катта глобал оқибати денгиз сатҳининг кескин кўтарилиши бўлади. “Антарктида келажакда денгиз сатҳини ошириши мумкин бўлган энг йирик манбани ўзида сақлайди”, — деди у “Daily Mail” нашрига берган изоҳида.

Олимларнинг огоҳлантиришича, агар Антарктидадаги шельф музликлари заифлашса ёки парчаланишни бошласа, ҳозирча улкан муз қатламларини ушлаб турган табиий “муз қалқони” емирилиши мумкин. Натижада эса гигатонналаб муз океанга силжийди.

Мутахассислар фикрича, бу ҳолат миллионлаб инсонлар учун жиддий хавф туғдириши мумкин. Чунки муз қалқонининг йўқолиши денгиз сатҳини ҳатто 58 метргача кўтариши эҳтимолдан холи эмас.

Маълумот учун: Шельф музликлари — қуруқликдаги муз қатламларининг денгизга чиқиб борувчи қисми ҳисобланади. Улар сув устида сузиб туради ёки қисман денгиз тубига таянади. Бундай музликлар қирғоқдан денгиз томон оқиб боради ва улкан муз “платоси”ни ҳосил қилади.