Жаҳон соғлиқни сақлаш ташкилоти (ЖССТ) Испанияда ўтказилган матбуот анжуманида MV Hondius круиз кемасида хантавирус билан боғлиқ 11 та ҳолат аниқланганини маълум қилди.

Ташкилот Бош директори Тедрос Адханом Гебрейесуснинг таъкидлашича, касалланганларнинг 9 нафарида Andes хантавируси лаборатория усулда тасдиқланган, яна икки ҳолат эса эҳтимолий деб баҳоланмоқда.

Афсуски, ҳозиргача касалланганларнинг уч нафари вафот этган. Вирус аниқланганларнинг барчаси MV Hondius кемаси йўловчилари ёки экипаж аъзолари экани айтилмоқда.

Тедрос Гебрейесус бу ҳақдаги баёнотни Испания Бош вазири Педро Санчес билан учрашувдан сўнг ўтказилган матбуот анжуманида маълум қилган.