Биотехнология соҳасидаги «Colossal Biosciences» компанияси сунъий яратилган тухум ичида соғлом жўжаларни муваффақиятли очтириб чиқарди. Ҳозиргача компаниянинг Техасдаги фермасида шундай усулда етиштирилган 30 дан ортиқ товуқ парвариш қилинмоқда.

Компания вакилларининг билдиришича, икки йил давомида ишлаб чиқилган янги инкубация платформаси эмбрион ривожланиши учун керакли муҳитни табиий тухумсиз ҳам яратиб бера олади. Мутахассислар бу технология келажакда ҳайвонларни кўпайтириш усулларини тубдан ўзгартириши, шунингдек, йўқолиб кетган ёки йўқолиш хавфи остидаги турларни сақлаб қолишга ёрдам беришини таъкидламоқда.

Компания бош директори ва ҳаммуассиси Бен Ламм «USA TODAY» нашрига берган интервьюсида бу технология янада катта мақсад — йўқолиб кетган жонзотларни қайта тиклаш йўлидаги муҳим қадам эканини айтди.

Жумладан, компания ҳозирда тахминан 600 йил аввал Янги Зеландия ҳудудида йўқолиб кетган улкан моа қушларини «қайта тирилтириш» лойиҳаси устида ишламоқда. Моа тухуми товуқ тухумидан қарийб 80 баравар катта бўлгани сабабли анъанавий усуллар — бошқа қуш орқали инкубация қилиш имконияти йўқ. Шу боис олимлар сунъий инкубация муҳитини ривожлантиришга катта эътибор қаратмоқда.

Шу билан бирга, компания генетик ўзгартирилган ҳайвонлар устида ҳам тажрибалар ўтказмоқда. Улардан бири — «жунли сичқон» лойиҳаси бўлиб, бу келажакда мамонтга ўхшаш хусусиятларни қайта яратиш учун дастлабки қадам сифатида баҳоланмоқда.

Олимларнинг асосий ғояси — тирик организм она қорнидан ташқари муҳитда тўлиқ шаклланиши мумкин бўлган «экзоген ривожланиш» технологиясини яратишдан иборат. Мутахассислар фикрича, бу усул нафақат йўқолиб кетган турларни тиклаш, балки ҳозирда йўқолиш хавфи остида турган ҳайвонларни сақлаб қолишда ҳам қўл келиши мумкин.

Маълумот учун, улкан моа қушларининг бўйи 3,6 метргача, вазни эса 250 килограммгача етган. Улар инсонлар келганидан кейин бешафқат ов қилиш ва яшаш муҳитининг ўзгариши сабабли йўқолиб кетган. Бугунги кунда сунъий инкубация ва ген муҳандислиги каби технологиялар илгари фантастика деб қаралган имкониятларни реалликка айлантирмоқда.