Ҳиндистонда Эбола вирусига чалинган бўлиши мумкин бўлган илк ҳолат қайд этилди. Угандадан Бангалор шаҳрига келган 28 ёшли аёлда касаллик аломатлари кузатилиб, у карантинга олинган.

Маълум қилинишича, беморда тана оғриқлари пайдо бўлган. Миллий вирусология институтига юборилган дастлабки таҳлил натижаси Эбола вирусини тасдиқламаган. Аммо шифокорлар хавфни инобатга олиб, 48 соатдан кейинги иккинчи таҳлил ҳам манфий чиқмагунча, аёлни изоляцияда сақлашини билдирган.

Ҳиндистонда бундан олдин Эболага оид ҳолат сўнгги марта 12 йил аввал — 2014 йилдаги йирик эпидемия даврида қайд этилган эди. Ҳозир мамлакатда санитария назорати ва аэропортларда текширувлар кучайтирилган.

Шу билан бирга, Мексика ҳам вирус хавфи сабабли қўшимча чоралар жорий қилди. Аэропортларда текширувлар кучайтирилди, аҳолига Конго Демократик Республикасига сафар қилмаслик тавсия этилди. У ердан келаётган фуқаролар эса 21 кунлик карантиндан ўтказилади.

Жаҳон соғлиқни сақлаш ташкилоти (ЖССТ) эса Конго Демократик Республикаси ва Угандада тарқалаётган Бундибугио вируси билан боғлиқ вазиятни “халқаро аҳамиятга эга фавқулодда соғлиқни сақлаш ҳолати” деб баҳолаган. Шу муносабат билан Руанда ва Жанубий Судан ҳам юқори тайёргарлик ҳолатига ўтган.