Миграция агентлиги хорижда ишга жўнаш жараёнида фуқароларни лицензияга эга хусусий бандлик агентликлари билан шартнома тузиш ва тўловларни фақат белгиланган ҳисоб рақам орқали амалга оширишга чақирди.

Маълум қилинишича, лицензия фақат бир ташкилот номи учун берилади ва бошқа фирмалар ёки “консалтинг” хизматларига татбиқ этилмайди. Шу сабабли, нақд пул бериш ёки шахсий картага ўтказиш орқали тўлов қилиш хавфли ҳисобланади.

Агентликка кўра, тўлов фақат махсус депозит ҳисоб рақамига ўтказилиши ва албатта расмий чек билан тасдиқланиши керак.

Фуқароларга лицензияни текшириш, шартномадаги фирма номини солиштириш ҳамда барча тўлов чеклари ва ҳужжатларни сақлаб бориш тавсия этилган.