АҚШнинг собиқ президенти Жо Байденнинг турмуш ўртоғи Жилл Байден эрига ташхис қўйилган онкологик касаллик ҳақида маълумот бериб, собиқ президент умрининг охиригача саратон билан яшашига тўғри келишини айтди.

«Агар унга фақат простата саратони ташхиси қўйилганида, бу бошқа масала бўлар эди, чунки бу касалликни даволаш мумкин. Аммо саратоннинг суякларга метастаз бергани вазиятни бутунлай ўзгартириб юборди. Шу сабабли Жо ҳаётининг қолган қисмида ушбу касаллик билан яшайди, деб ўйман», — деди у.

Жилл Байденнинг таъкидлашича, касаллик суяк тўқималарига тарқалган бўлса-да, собиқ президент ҳозирда ўзини яхши ҳис қилмоқда ва фаол турмуш тарзини давом эттирмоқда.

Маълум қилинишича, Жо Байден 2025 йил май ойида ўзида простата безининг агрессив шаклдаги саратони аниқланганини маълум қилган эди. Шундан сўнг у беш ҳафталик нур терапияси курсини ўтаган. 2025 йил сентябрида эса унинг терисидаги хавфли ўсма жарроҳлик йўли билан олиб ташланган.

Байденлар оиласи учун онкологик касалликлар мавзуси анча оғриқли ҳисобланади. 2015 йилда Жо Байденнинг ўғли Бо Байден 46 ёшида мия саратони туфайли вафот этган. Шунингдек, сиёсатчи йиллар давомида саратон касалликларини ўрганиш ва даволашга қаратилган «Cancer Moonshot» дастурини фаол қўллаб-қувватлаб келган.

Мутахассисларнинг таъкидлашича, метастатик простата саратони — саратон ҳужайраларининг простата безидан ташқарига чиқиб, асосан суяклар, лимфа тугунлари ёки бошқа аъзоларга тарқалган босқичидир. Бу босқич тўлиқ даволанмайдиган ҳисобланса-да, замонавий тиббиёт усуллари касалликни назорат қилиш ва бемор умрини бир неча йилга узайтириш имконини беради.