Арманистон, Туркманистон ва Озарбайжон Яқин Шарқдаги вазият оқибатида миграция инқирозига дуч келиши мумкин. Бу ҳақда МДҲнинг Терроризмга қарши кураш маркази раҳбари, генерал-полковник Евгений Сисоев Ҳамдўстликка аъзо давлатлар ваколатли органлари бош бўлинмалари раҳбарларининг XIX йиғилишида маълум қилди.

Сисоевнинг таъкидлашича, халқаро вазиятнинг кескинлашиши, жумладан, Яқин Шарқдаги воқеалар Ливия ва Ироқда кузатилганига ўхшаш кенг кўламли миграция жараёнлари ҳамда гуманитар инқироз юзага келиши учун замин яратмоқда. Унинг сўзларига кўра, бундай инқироз оқибатлари билан МДҲнинг барча давлатлари тўқнаш келиши мумкин, аммо биринчи навбатда Эрон билан чегарадош мамлакатлар катта хавф остида қолади.

Шунингдек, Сисоев МДҲ давлатлари махсус хизматлари 2025 йилда 300 дан ортиқ террорчилик хуружи уринишларининг олдини олганини қайд этди. Унинг айтишича, Ҳамдўстлик мамлакатлари хавфсизлик органлари ўзаро ҳамкорлик қилиб, самарали натижаларга эришиш имконини берувчи зарур чораларни кўрмоқда.

«2025 йил давомида мамлакатларимизда терроризм ва экстремизм билан боғлиқ 2,5 мингдан ортиқ жиноятнинг олди олинди. Улар қаторида 300 дан зиёд террорчилик хуружига уриниш, терроризмни молиялаштириш билан боғлиқ 100 дан ортиқ жиноят ҳамда радикал ғояларни тарқатишга оид қарийб 2 мингта ҳолат бор», — деди у.

МДҲ Терроризмга қарши кураш маркази раҳбарининг маълум қилишича, 200 дан ортиқ террорчилик ва экстремистик ҳужайралар фаолиятига чек қўйилган, терроризм ва экстремизмни молиялаштиришнинг қарийб 900 та манбаси ва 300 та канали аниқланиб, тўхтатилган. Шунингдек, радикал мазмундаги контент жойлаштирилган қарийб 19 мингта ахборот ресурсининг фаолияти чекланган.

Терроризм ва экстремизм ҳолатлари бўйича 2,3 мингдан зиёд жиноят иши қўзғатилган. Натижада 1,5 мингдан ортиқ террорчи ва экстремист жиноий жавобгарликка тортилган. Бундан ташқари, 100 дан ортиқ террорчи ва 2 мингдан зиёд экстремист вайронкор фаолиятдан воз кечишга кўндирилган.

Сисоевнинг қайд этишича, экстремистик мафкура таъсирига тушиб қолган шахсларни радикаллашувдан чиқариш мақсадида кенг кўламли профилактик тадбирлар ҳам амалга оширилган.