Президент томонидан имзоланган ЎРҚ–1150-сонли Қонун билан Меҳнат кодекси ва айрим қонун ҳужжатларига ўзгартириш ҳамда қўшимчалар киритилди.

Унга кўра, агар яраштириш таомиллари орқали жамоавий меҳнат низосини ҳал этишнинг имкони бўлмаса, меҳнат жамоаси иш ташлаш тўғрисида қарор қабул қилиши мумкин. Иш ташлашда қатнашиш ихтиёрий бўлиб, ҳеч ким унда қатнашишга ёки қатнашмасликка мажбурланмайди.

Иш ташлашни эълон қилиш ҳақидаги қарор ташкилот ходимларининг умумий йиғилишида қатнашганларнинг ярмидан кўпи томонидан қўллаб-қувватланган тақдирда қабул қилинади. Бундай қарор иш ташлаш бошланишидан камида бир ой олдин қабул қилиниши лозим.

Қонунга мувофиқ, касаба уюшмаси қўмитаси қарор қабул қилинганидан кейин бир иш куни ичида иш берувчини ёзма равишда хабардор қилиши шарт. Иш берувчи эса мазкур хабарномани олганидан сўнг бир иш куни ичида жамоавий меҳнат низоларини тартибга солиш бўйича ваколатли давлат органларини огоҳлантиради.

Янги тартибга кўра, иш ташлашга касаба уюшмаси қўмитасининг ваколатли вакили раҳбарлик қилади. Ходимнинг иш ташлашда иштирок этгани уни интизомий жавобгарликка тортиш учун асос бўла олмайди. Шунингдек, иш ташлаш давомида ходимнинг иш жойи ва лавозими сақланиб қолади.

Бироқ иш берувчи иш ташлашда қатнашган вақт учун иш ҳақини тўламаслик ҳуқуқига эга.

Агар иш ташлаш инсонлар ҳаёти ва соғлиғига зарар етказиш хавфини туғдирса, жамоат хавфсизлиги, жамоат тартиби, тинчлик ёки экологик барқарорликка таҳдид солса, суд қарори билан унинг бошланиш вақти 30 кунгача кечиктирилиши ёки иш ташлаш 30 кунгача тўхтатиб турилиши мумкин.

Қонун расмий эълон қилинган кундан эътиборан уч ой ўтгач кучга киради.