Туркиянинг Истанбул шаҳрида юз берган оғир йўл-транспорт ҳодисаси оқибатида бир оила фожиали тарзда ҳаётдан кўз юмди.

Маълум қилинишича, бахтсиз ҳодиса 11 июнь куни эрталаб Чекмекўй тумани ҳудудидан ўтувчи Шимолий Мармара автомагистралида содир бўлган. Сабиҳа Гўкчен аэропортидан қайтаётган 29 ёшли Садик Гунден бошқарувидаги енгил автомобиль ҳаракатланаётган юк машинасининг орқа томонига келиб урилган.

Кучли зарба оқибатида автомобиль юк машинаси остига кириб кетган. Ҳодиса оқибатида ҳайдовчи Садик Гунден, унинг турмуш ўртоғи — Ўзбекистон фуқароси, 31 ёшли Азиза Ҳотамова Гунден ҳамда уларнинг 2 ойлик ўғли Тимурхон Гунден воқеа жойида ҳалок бўлган.

Қутқарувчилар автомобиль ичида қисилиб қолган уч кишининг жасадини махсус техникалар ёрдамида чиқариб олишди.

Маҳаллий ОАВ маълумотларига кўра, эр-хотин тўрт йил аввал турмуш қурган бўлиб, уларнинг 3 ёшли Саид исмли яна бир фарзанди бор. Бахтли тасодиф туфайли у фожиа вақтида ота-онаси билан бирга бўлмаган.

Энг ачинарлиси, яқин кунларда 2 ойлик Тимурхоннинг суннат тўйини ўтказиш режалаштирилган эди. Бироқ бир лаҳзалик офат бутун бир оиланинг умрига нуқта қўйди.