Перуда бўлиб ўтган президентлик сайловларининг иккинчи босқичида консерватив сиёсатчи Кейко Фухимори чап қанот номзоди Роберто Санчесни ортда қолдирди.

51 ёшли Кейко Фухимори — 1990-йиллар охирида Перу президенти бўлган, инсониятга қарши жиноятлар учун судланган Алберто Фухиморининг қизи. У сайловолди кампанияси давомида отасининг жиноятчилик ва қуролли исёнчиларга қарши қатъий кураш сиёсатини давом эттиришга ваъда берган.

Кейко Фухимори сўнгги 15 йил давомида бир неча бор президентликка номзодини қўйган, бироқ ҳар сафар турли сиёсий қарашдаги рақиблари Фухиморилар оиласи вакилининг ҳокимиятга келишига йўл қўймаслик учун бирлашган эди. Бу сафар эса унинг тўртинчи уриниши муваффақиятли якунланди.

Сайлов бюллетенларини қайта санаш уч ҳафтадан ортиқ давом этди. Якуний натижаларга кўра, Фухимори 9 223 396 овоз (50,135 фоиз), Роберто Санчес эса 9 173 755 овоз (49,865 фоиз) олди. Номзодлар ўртасидаги фарқ 49 641 овозни ташкил этди ва бу Перу президентлик сайловлари тарихидаги энг кичик тафовутлардан бири бўлди.

Фухиморининг асосий сайловолди ваъдаси жиноятчиликка қарши кескин кураш олиб боришдан иборат бўлди.

«Бутун куч-ғайратимиз энг яхши биладиган ишимизга — жиноятчиликка нисбатан қатъий чоралар кўришга қаратилади», — деди у.

Сайловнинг иккинчи тури 7 июн куни бўлиб ўтган. Натижалар ҳали Перу Миллий сайлов ҳайъати (JNE) томонидан расман тасдиқланиши керак.

Кейко Фухимори Перу тарихида президентлик сайловларида ғалаба қозонган биринчи аёлга айланди. Аввалроқ Дина Болуарте 2022 йилда вице-президент сифатида давлат раҳбари лавозимини эгаллаб, мамлакатнинг биринчи аёл президенти бўлган эди.