Ҳиндистонда бедарак йўқолган 60 ёшли эркакнинг жасади топилди. Дастлабки маълумотларга кўра, унга номаълум йиртқич ҳужум қилган ва жасадининг бир қисмини еб кетган.
Воқеа 27 июнь куни содир бўлган. 60 ёшли Веллиангири тамаринд мевасини териш учун ўрмонга кирган, аммо кечгача уйига қайтмаган. Шундан сўнг қидирув ишлари бошланган, бироқ тун қоронғилиги сабабли улар вақтинча тўхтатилган.
Эртаси куни — 28 июнь соат 13:30 атрофида эркакнинг йиртқич томонидан парчаланган жасади қалин буталар орасидан топилган.
Ҳозирча ҳужумни айнан қайси ҳайвон амалга оширгани аниқланмаган. Кучли ёмғир барча изларни ювиб кетгани сабабли мутахассислар йиртқич турини аниқлай олмаяпти.
Маҳаллий ҳокимият ва ўрмон хизмати ҳудудга фотоқопқонлар (ҳаракатни қайд этувчи камералар) ўрнатилишини маълум қилди. Бу орқали одамларга ҳужум қилаётган йиртқични аниқлаш режалаштирилган.
Сўнгги янгиликлар