Франция пойтахти Париж атрофидаги Нантер коммунасида жойлашган дўконда чегирмали савдо пайтида харидорлар кондиционер ва вентиляторлар учун муштлашиб кетди. Бунга мамлакатда кузатилаётган навбатдаги аномал иссиқ тўлқини сабаб бўлган.

Маълум қилинишича, дўкон соат 08:00 да очилиши олдидан унинг қаршисида 100 нафардан ортиқ одам тўпланган. Савдо тармоғи Франция бўйлаб жойлашган 1600 та дўконида жами 200 минг дона кондиционер ва вентиляторга чегирма эълон қилган эди. Бироқ айнан ушбу Нантердаги филиалда атиги 10 та кондиционер мавжуд бўлган.

Дўкон очилиши билан одамлар ичкарига ёппасига ёпирилган ва натижада кириш эшигининг шишалари синган. Вазиятни назоратга олиш учун воқеа жойига полиция ходимлари чақирилган.

Шу каби юқори талаб Париж ва унинг атрофидаги бошқа савдо шохобчаларида ҳам кузатилган. Айрим харидорлар навбат эгаллаш учун тунги соат 01:00 даёқ келиб олишган.

Сўнгги кунларда Францияда ғайриоддий иссиқ об-ҳаво ҳукм сурмоқда. Мамлакат метеорология хизмати 96 та департаментнинг 72 тасида об-ҳаво хавфининг юқори даражасини эълон қилди. Ҳаво ҳарорати 40 °C га яқинлашган, айрим ҳудудларда эса бу кўрсаткичдан ҳам ошиб кетган.

Олимларнинг таъкидлашича, бу галги кучли иссиқ ҳаво массаларининг ўзига хос циркуляцияси (айланиши) билан боғлиқ бўлиб, улар экватордаги иссиқ ҳавони Арктика томон олиб бормоқда. Шунингдек, глобал иқлим ўзгариши ҳам Европадаги иссиқлик тўлқинининг кучайишига жиддий таъсир кўрсатмоқда. Глобал исиш туфайли тупроқ қуриб бораётгани сабабли ер юзасининг намлик буғланиши орқали табиий совиш жараёни сусайган.