Навоий вилояти ИИБ ходимлари томонидан республика бўйича 21 кишининг 336 миллион сўм пулларини қўлга киритган киберфирибгарлар фаолияти фош этилди. Бу ҳақда вилоят ИИБ матбуот хизмати хабар берди.

Маълум қилинишича, фуқаро банк картасидан катта миқдордаги пуллар яширин равишда киберфирибгарлар томонидан талон-торож қилингани ҳақида хабар берган. Унга номаълум шахс томонидан зарарланган APK иловалари жўнатилган ва шу орқали шахсий маълумотлари қўлга киритилган. Сўнгра эса унинг E-auksion платформасида рўйхатдан ўтганидан фойдаланиб, банк картасида мавжуд 230 миллион сўм пуллар ўзлаштириб олинган.

Хавфсиз ва соғлом юрт кенг қамровли тезкор-профилактик ойлиги доирасида тезкор тадбир ташкил этилиб, фирибгарликда гумон қилинган уч нафар шахслар қўлга олинган. Уларнинг жиноий схемалари ўрганилганда, республика бўйлаб 21 нафар фуқаронинг жами 336 миллион сўм маблағларини киберфирибгарлик орқали қўлга киритгани маълум бўлди.

Мазкур жиноий гуруҳга нисбатан Жиноят кодексининг 169-моддаси (ўғрилик) 4-қисми билан жиноят иши қўзғатилиб, тергов ҳаракатлари олиб борилмоқда.