Экология ва иқлим ўзгариши миллий қўмитаси Тошкент шаҳрининг турли ҳудудларида 11 июль куни сезилган куйинди ҳиди юзасидан расмий муносабат билдирди.

Маълум қилинишича, Тошкент вилояти Оҳангарон туманида жойлашган, Тошкент шаҳар ҳокимлиги тасарруфидаги «Махсустранс» қаттиқ маиший чиқиндилар полигонида табиий ёнғин юз берган. Айни пайтда ёнғин тўлиқ бартараф этилган бўлиб, полигонда рекультивация ва тупроқ билан қоплаш ишлари олиб борилмоқда.

Қўмита мутахассисларининг таъкидлашича, кун давомида очиқ алангалар ўчирилган бўлса-да, чиқиндиларнинг айрим қисмларида ички чўғланиш давом этган. Шу сабаб ҳавога тутун ва майда заррачалар ажралиши тўхтамаган.

Кечқурунгача шаҳарда деярли шамол кузатилмаган. Соат тахминан 19:00 дан кейин эса шамол жануби-шарқ томондан, яъни полигон жойлашган ҳудуддан Тошкент томонга кучайган.

Шу вақтда ҳаво сифати мониторинги станциялари PM₂.₅ ва PM₁₀ майда дисперс заррачалари концентрацияси ошганини қайд этган. Шаҳарнинг турли туманларида яшовчи фуқаролар ҳам тутун ва куйинди ҳидини сезганини билдирган.

Дастлабки хулосага кўра, Тошкентдаги куйинди ҳиди шамол йўналиши ва тезлигининг кескин ўзгариши оқибатида полигондан чиққан тутун массалари ҳамда майда аэрозол заррачаларининг шаҳар томон кўчиши натижасида юзага келган.