Европа қитъасига навбатдаги кучли иссиқлик тўлқини яқинлашмоқда. Сўнгги маълумотларга кўра, аномал жазирама оқибатида ҳозиргача қарийб 10 минг киши вафот этди. Шу билан бирга, Греция, Испания, Португалия ва Францияда кенг кўламли ўрмон ёнғинлари давом этмоқда.

Мутахассисларнинг фикрича, яқин кунларда ҳарорат янада кўтарилиши мумкин. Бу эса вазиятни янада оғирлаштириб, ёнғинлар кўламини кенгайтиради. Европа мамлакатлари ҳукуматлари офатга қарши турли чекловлар, жумладан, пиротехника воситаларидан фойдаланишни тақиқлаш каби чораларни кўрмоқда. Бироқ тинимсиз курашга қарамай, аланга ўчоқлари сони аллақачон минглабни ташкил этмоқда.

Хорватия: Ёмғир ёрдамга келди Хорватиянинг Корчула оролида кучли ёғингарчилик ўрмон ёнғинини бир сутка ичида ўчиришга имкон берди. Аммо олов тўлиқ жиловлангунга қадар бир нечта турар жой бинолари ва хўжаликларга жиддий зарар етди. Жабрланган коттеж эгаларидан бири Иван Бачич вазиятни шундай тасвирлайди:

«У ерда узумзор барпо этишни, уй ва омборхона қуришни режалаштирган эдик. Бироқ том бутунлай ёниб кетди. Атроф худди оловли занжир ичида қолгандек, гўё дўзахдамиз. Буни сўз билан ифодалаш қийин, инсоннинг юраги оғрийди».

Испания: Энг ҳалокатли офат Испаниядаги ёнғинлар мамлакат тарихидаги энг даҳшатли офатлардан бири сифатида баҳоланмоқда. Ҳозиргача 2 370 гектар майдон кулга айланган. Расмий маълумотларга кўра, 12 киши ҳалок бўлгани тасдиқланган, яна 23 нафар фуқаро бедарак йўқолган деб ҳисобланмоқда. Андалусия ҳукумати раҳбари Хуан Мануэль Морено Бонильянинг маълум қилишича, қурбонларнинг шахси ДНК экспертизаси орқали аниқланмоқда. Дастлабки тахминларга кўра, ҳалок бўлганларнинг аксарияти Буюк Британия ва Бельгия фуқароларидир.

Португалия ва Греция: Аҳоли эвакуация қилинмоқда Португалиянинг марказий ҳудудларида эса аланга аҳоли пунктларига хавф туғдирмоқда. Кучли шамол туфайли олов тез тарқалаётгани сабабли бир қатор қишлоқлар аҳолиси шошилинч равишда эвакуация қилинди.

Грециянинг Салоники шаҳри атрофида эса ёнғин қишлоқ хўжалиги экинларига катта хавф туғдирмоқда. Оловни ўчиришга махсус вертолётлар ва авиация жалб этилган. Аммо унгача бир нечта саноат корхоналари бутунлай ёниб кетган.

Франция: ЮНЕСКО мероси хавф остида Францияда ёнғин машҳур Фонтенбло ўрмонини қамраб олди. Офатга қарши курашга икки минг нафар ўт ўчирувчи ва авиация техникаси сафарбар этилган. Пузоль-Минервуа ва унинг атрофидаги ҳудудларда юзлаб дарахтлар кулга айланди. Энг ачинарлиси, олов ЮНЕСКОнинг Бутунжаҳон мероси рўйхатига киритилган тарихий қасрларга ҳам яқинлашмоқда.

Европа мониторинг тизими маълумотларига кўра, жорий йил бошидан буён Европа Иттифоқи ҳудудида 126 минг гектардан ортиқ майдон ёнғинлардан зарар кўрган. Франция Пиренейи ва бошқа хавфли ҳудудлардан 10 мингга яқин аҳоли хавфсиз жойларга кўчирилган. Вазият жиддий назорат остида қолмоқда.