Бугун Бухоро шаҳридан соат 10:57 да йўлга чиққан «Афросиёб» тезюрар поезди нақд икки соату қирқ беш дақиқа кечикиб Тошкентга етиб келди. Аслида Тошкент вокзалига 15:06 да етиб келиши керак бўлган тезюрар одатдагидан жуда секин ҳаракатланиб, 17:51 да Тошкент вокзалида бўлган.

Йўловчиларга тушунтириш берилишича, жазирама сабаб поезд одатдагидек тез юролмаган. Лекин чипта сотилишидан олдин йўловчилар бу ҳақда огоҳлантирилмаган. Поезд Самарқанд шаҳригача белгиланган вақтда келган.

Лекин ҳаво ўта қизиб кетгани сабабли Самарқанд—Тошкент йўналишида тез юролмаган. Айтишларича, эртага ҳам «Афросиёб» секин ҳаракатланиши мумкин.

Йўловчиларнинг эътирозларига нисбатан «бу ҳолат темир йўл мутасаддиларининг айби билан эмас, об-авҳо туфайли юз бергани» сабабли компенсация тўланмаслиги ёки чипта пулининг бир қисми қайтарилмаслиги айтилган.

Поезд кечикиши сабабли самолётга улгуролмаган айрим йўловчиларга кўрилган зарар қоплаб берилиши мумкинлиги тушунтирилган.

Ҳолат юзасидан масъуллардан изоҳ беришларини кутамиз.