Испания терма жамоаси 2026 йилги футбол бўйича жаҳон чемпионати финалида Аргентинани мағлуб этиб, ўз тарихида иккинчи марта жаҳон чемпиони деган шарафга эришди.

Лионель Скалони шогирдлари финалгача барча учрашувларда ғалаба қозониб келган эди. Аргентиналиклар гуруҳ босқичида Жазоир, Австрия ва Иорданияни мағлуб этди. Плей-оффда эса Кабо-Верде, Миср, Швейцария ҳамда Англия тўсиғидан ўтиб, ҳал қилувчи баҳсга йўл олди.

Испания эса мусобақани Кабо-Верде билан дурангдан бошлаган бўлса-да, кейинги баҳсларда Саудия Арабистони ва Уругвайни енгди. Плей-офф босқичида Австрия, Португалия, Бельгия ҳамда Франция устидан зафар қучиб, финалга чиқди.

Финал Лионель Месси учун фаолиятидаги учинчи жаҳон чемпионати финали бўлди. 39 ёшли ҳужумчи шу орқали жаҳон чемпионатлари тарихида учта финални асосий таркибда бошлаган илк футболчи сифатида тарихга кирди. Бироқ бу сафар Аргентина чемпионлик унвонини ҳимоя қила олмади.

Финалга қадар Испания мусобақада атиги битта гол ўтказиб юборган ва 13 та гол урган бўлса, Аргентина 19 та гол киритиб, 7 та гол ўтказган эди.

Шу тариқа, Испания ўз тарихида иккинчи бор жаҳон кубогини қўлга киритди, Аргентина эса 2022 йилдаги чемпионлик унвонини сақлаб қола олмади.