Испаниянинг Барселона шаҳри метрополитенида содир бўлган ёнғин оқибатида 130 дан ортиқ киши тутундан заҳарланди. Бу ҳақда шаҳар ёнғин хавфсизлиги хизмати маълум қилди.

Маълум қилинишича, ёнғин содир бўлганидан сўнг қутқарувчилар ва шаҳар гвардияси ходимлари поезддаги йўловчиларни зудлик билан эвакуация қилган. Ёнғин кичик ҳажмда бўлгани сабабли қисқа вақт ичида тўлиқ бартараф этилган.

Шошилинч тиббий ёрдам хизмати 136 нафар жабрланувчига тиббий ёрдам кўрсатган. Улардан 39 нафари енгил ва ўртача оғир аҳволда шифохонага ётқизилган.

Ҳодиса сабабли «Ла-Сагрера» ва «Каталония» бекатлари оралиғида метро ҳаракати вақтинча тўхтатилди. Мазкур йўналишда қатновлар 28 июль куни эрталаб қайта тикланиши кутилмоқда.

Ҳозирча ёнғиннинг келиб чиқиш сабаблари очиқланмаган.