Испаниянинг Шимолий Африкадаги Сеута анклавида кузатилаётган миграция инқирози тобора кескин тус олмоқда. Сўнгги маълумотларга кўра, чегарани ноқонуний кесиб ўтишга уринишлар оқибатида ҳалок бўлганлар сони 61 нафарга етди. Бу ҳозиргача қайд этилган энг юқори кўрсаткич ҳисобланмоқда.

Испания ташқи ишлар вазири Хосе Мануэль Альбарес маълум қилишича, шу ҳафта Сеутага кириб келган тахминан 60 минг нафар муҳожирнинг 48–50 минг нафари ихтиёрий ёки ҳуқуқ-тартибот органлари назорати остида Марокашга қайтарилган.

Унинг таъкидлашича, Сеута ва Мелильяда қолган ноқонуний муҳожирлар Испаниянинг материк қисмига полиция назоратидан ўтмасдан кира олмайди ва Шенген ҳудудининг хавфсизлиги таъминланган.

Бироқ гуманитар вазият оғирлигича қолмоқда. Cadena SER радиоси маълумотига кўра, муҳожирлар денгиз орқали сузиб ўтиш, тўлқинсиндиргичлар ёки чегара тўсиқларини ошиб ўтишга уринган вақтда ҳалок бўлганлар сони 61 нафарга етган. Қутқарувчилар Тарахаль соҳилида яна бир неча жасадни топмоқда ва қурбонлар сони яна ортиши мумкинлиги айтилмоқда.

Италия Испания билан чегара назоратини қайта тиклади

Миграция инқирози Европа Иттифоқи ичида ҳам жиддий баҳсларга сабаб бўлди. Италия ҳукумати хавфсизлик нуқтаи назаридан Испания билан Шенген келишуви амалини 30 кунга вақтинча тўхтатиш ҳақида қарор қабул қилди.

Италия бош вазири Жоржа Мелони мамлакат денгиз ва ҳаво орқали Испания билан амал қилаётган эркин ҳаракатланиш тартибини вақтинча бекор қилиб, чегара назорати қайта жорий этилишини маълум қилди.

Унинг сўзларига кўра, мазкур чора Европа Иттифоқининг ташқи чегараларини ҳимоя қилиш ва назоратсиз миграция оқимининг олдини олиш мақсадида қабул қилинган. Италия бу ҳақда Европа комиссиясини ҳам расман хабардор қилган.

Мелилья чегарасида ҳам вазият кескин

Испаниянинг яна бир анклави — Мелилья чегарасида ҳам тўқнашувлар давом этмоқда. Марокаш хавфсизлик кучлари чегара постини босиб олишга уринган ўнлаб ёшларни тарқатиш учун кўздан ёш оқизувчи газдан фойдаланган.

Маҳаллий ОАВ маълумотига кўра, муҳожирлар полицияга тош отган, жавобан эса тартиб сақлаш ходимлари резина ўқлардан фойдаланган. Тўқнашувлар оқибатида бир нечта автомобиль ва автобус ёқиб юборилган, полиция ходимлари ҳамда муҳожирлар орасида жабрланганлар бор.

Ҳозирча Сеута ва Мелилья атрофидаги вазият таранглигича қолмоқда.