Буюк Британияда ҳайвонларни ҳимоя қилиш билан шуғулланувчи PETA ташкилоти итларнинг 67 турини наслчилик йўли билан кўпайтиришни чеклаш ташаббуси билан чиқди. Рўйхатдан бигль, бульдог, такса ва чихуахуа каби машҳур зотлар ҳам ўрин олган.

Ташаббусга итларни ташқи кўринишининг муайян хусусиятларига қараб селекция қилиш натижасида юзага келадиган ирсий касалликлар сабаб бўлган.

Айниқса, бурни қисқа итлар — мопс ва француз бульдогларида нафас олиш билан боғлиқ муаммолар ҳамда жисмоний зўриқишга чидамлиликнинг пасайиши кўп учрайди.

Бошқа зотларда ҳам жиддий соғлиқ муаммолари қайд этилган. Масалан:

• Кавалер-кинг-чарльз-спаниелларда — сурункали оғриқ келтириб чиқарувчи сирингомиелия;
• Таксаларда — умуртқалараро диск касалликлари хавфи юқори (бу касаллик оғир ҳолатларда фалажликка олиб келиши мумкин);
• Уэльс коргиларда эса бўғимлар билан боғлиқ касалликлар учрайди.

Таклиф этилаётган чоралар мазкур зотларни уйда боқишни тўлиқ тақиқлашни англатмайди. Асосий мақсад — наслчиликда ташқи кўринишдан кўра ҳайвонларнинг соғломлиги ва ҳаётчанлигига устувор аҳамият беришдир.

Британия парламентидаги бир гуруҳ депутатлар ҳам ҳукуматнинг расмий режаларида итларни кўпайтиришни тўлиқ тақиқлаш назарда тутилмаганини билдирган.

Айни пайтда Британияда бешта ит зотини сақлаш тақиқланган.