Хитой суди Нанкин шаҳри Халқ вакиллари йиғини Доимий қўмитасининг собиқ раиси Лун Сянни 261 млн юандан (тахминан 38,7 млн доллар) ортиқ миқдорда пора олгани учун ўлим жазосига ҳукм қилди. Бироқ жазони ижро этиш икки йилга кечиктирилди.

Суд, шунингдек, Лун Сяннинг барча шахсий мол-мулкини мусодара қилиш, пора олиш орқали қўлга киритилган маблағларни давлат хазинасига қайтариш ҳамда уни сиёсий ҳуқуқларидан умрбод маҳрум этиш ҳақида қарор чиқарган.

Суд жараёнида Лун Сян айбига иқрор бўлиб, қилмишидан пушаймонлигини билдирган.

Собиқ амалдорга пора олишдан ташқари, бошқа шахслардан инсайдерлик маълумотларини олиб, акциялар сотиб олгани бўйича ҳам айблов қўйилган. У 2017 йил ноябридан 2018 йил январигача бўлган даврда 10 млн юандан (тахминан 1,5 млн доллар) ортиқ маблағга акциялар сотиб олган.

2026 йил январь ойида Хитой раҳбари Си Цзиньпин мамлакатда коррупцияга қарши кураш бўйича вазият мураккаб ва жиддийлигича қолаётганини таъкидлаган. У порахўрликка қарши қатъий курашни давом эттириш ва коррупционерлар учун яшириниш имкониятларини бартараф этишга чақирган.