Тошкент халқаро аэропортида Таиланддан олиб келинган йирик миқдордаги синтетик наркотик моддалар аниқланди.

Давлат хавфсизлик хизмати томонидан «Тошкент-Аэро» ихтисослаштирилган божхона комплекси билан ҳамкорликда ўтказилган тезкор-қидирув тадбирлари давомида «Бангкок — Тошкент» йўналишида учиб келган икки нафар фуқаро ушланган.

Текширувда уларнинг юклари орасида шиша ва алюминий идишларга яширилган 4,6 кг мефедрон синтетик наркотик моддаси борлиги аниқланган.

Шунингдек, гумонланувчиларнинг Тошкент шаҳридаги яшаш манзили кўздан кечирилганда, 1,5 литр гашиш мойи ва 8 литр эритувчи воситалар ҳам топилиб, далилий ашё сифатида олиб қўйилган.

Тезкор тадбирлар давомида хориждан келтирилган наркотикларни Тошкент шаҳрида қабул қилиб олган, 1997 йилда Жиззах вилоятида туғилган шахс ҳам қўлга олинган. Ундан 635 грамм «альфа-ПВП» наркотик моддаси ашёвий далил сифатида олинган.

Ҳолат юзасидан Жиноят кодексининг 246-моддаси 2-қисми (контрабанда) билан жиноят иши қўзғатилиб, тергов ҳаракатлари олиб борилмоқда.

Амалдаги қонунчиликка кўра, мазкур турдаги жиноятларни содир этганлик учун 10 йилдан 20 йилгача озодликдан маҳрум қилиш жазоси белгиланган.