АҚШда Жорни Уивер исмли 20 ёшли қиз коллежда ўқиш учун маблағ тўплаш мақсадида опасининг уйидаги кийимлар шкафига жойлашиб, 8 ой давомида шу ерда яшади. У кун бўйи ишлаб, топган маблағларининг деярли барчасини жамғарган.

Уивернинг айтишича, шу тариқа у Northwest Arkansas Community College коллежидаги ўқишининг биринчи семестри учун зарур маблағни мустақил равишда тўплаган ва контрактни ўзи тўлаган.

Жорни Уивер 8 ёшида онасидан айрилган. Шундан сўнг у катта оилада қариндошлари қўлида тарбияланган. Уйда ундан ташқари яна етти нафар бола бўлган. Молиявий қийинчиликлар сабабли кийим-кечак ва озиқ-овқат ҳам умумий бўлган, ҳатто Уивер 16 ёшигача ўзининг алоҳида ётоғига ҳам эга бўлмаган.

Кейинчалик у тўрт йил дугонасининг оиласи билан яшаган. Аммо 20 ёшида уй-жойсиз қолгач, ҳаётини ўзгартиришга қарор қилган.

Уивер ҳамширалик мутахассислигини танлаган. У ушбу касб орқали қашшоқликдан чиқиб, молиявий барқарор ҳаётга эришишни мақсад қилган.

Опасининг уйига кўчиб ўтгач, парранда гўштини қайта ишлаш корхонасининг сифат назорати бўлимига ишга жойлашган. У соатига тахминан 17 доллар маош олган. Шу билан бирга, саккиз ой давомида кийимлар шкафида яшаб, харажатларини имкон қадар қисқартирган.

Натижада Уивер 2 минг долларга ҳайдалган (ишлатилган) автомобиль сотиб олган, уй-жой билан боғлиқ 1 минг доллардан ортиқ қарзини тўлаган ва коллежнинг биринчи семестри учун яна қарийб 2 минг доллар жамғарган.

Ҳозирда у ўзининг квартирасида яшайди, ҳафтасига 40 соатдан ортиқ ишлайди ва бир вақтнинг ўзида таҳсил олмоқда. У ўқиш учун кредит олмасликка ҳаракат қилмоқда, чунки коллежни тамомлагандан кейин қарз тўлашни истамайди.

Уивер ижтимоий тармоқларда ўзининг молиявий мустақилликка эришиш йўли ҳақида ҳикоя қилиб боради. У оиласида биринчи бўлиб олий таълим олаётган талабаларга мотивация беришни истайди.