Германиядаги Констанц университети олимлари ўтказган тажрибада мингта сунъий интеллект виртуал муҳитга жойлаштирилиб, икки мазмунсиз вариантдан бирини танлаш сўралган. Тўғри жавоб мавжуд бўлмаган ва тизимларга ҳамкорлик қилиш бўйича ҳеч қандай кўрсатма берилмаган.

Шунга қарамай, моделлар бир-бирининг танловларини кузатиб, ҳаракатларини синхронлаштирган ва охир-оқибат ягона фикрга келган. Тадқиқот натижалари Science Advances журналида чоп этилган.

Олимлар бу жараённи «кўпчиликка эргашиш» ҳодисаси билан изоҳлаган. Вариантлардан бири дастлаб озгина устунликка эга бўлса, вақт ўтиши билан у бутун гуруҳнинг умумий танловига айланган.

Тажрибада Claude, GPT ва Llama оилаларига мансуб 10 та модель синовдан ўтказилган. Энг юқори натижани Claude 3.5 Sonnet қайд этган — у мингта агентдан иборат гуруҳда ҳам ягона қарорни сақлаб қолган.

Олимлар бундай автоматик консенсус мураккаб вазифаларни ҳал қилишда имкониятлар очиши билан бирга, хатоларнинг бутун тизим бўйлаб кўр-кўрона такрорланиши хавфини ҳам келтириб чиқариши мумкинлигини таъкидлаган.