Ўзбекистонда банк ва тўлов иловаларида рўйхатдан ўтишда телефон рақами эгасининг ЖШШИРи фойдаланувчининг ЖШШИРига мослиги текширилади. Мослик бўлмаса, мобил иловага рўйхатдан ўтиш ёки банк картасини бириктиришга рухсат берилмайди.

Марказий банк томонидан масофадан молиявий хизмат кўрсатишда ахборот ва киберхавфсизликни таъминлаш ҳамда фирибгарликнинг олдини олиш бўйича янги талаблар белгиланди. Тегишли қарор 14 август куни Адлия вазирлигида давлат рўйхатидан ўтказилган.

Янги тартибга кўра, мобил иловага рўйхатдан ўтишда масофавий биометрик идентификациядан ўтиш талаб этилади. Шунингдек, телефон рақамига бириктирилган шахснинг ЖШШИРи текширилади. Агар маълумотлар мос келмаса, рўйхатдан ўтиш ёки банк картасини бириктиришга йўл қўйилмайди.

Бироқ телефон рақами фойдаланувчининг яқин қариндошига тегишли бўлса ва қариндошлик тасдиқланса, рўйхатдан ўтишга рухсат берилади.

P2P ўтказмаларига янги талаблар

Белгиланган лимитдан юқори бўлган барча P2P пул ўтказмалари OTP-код ёки бошқа муқобил аутентификация усули орқали тасдиқланиши шарт. Веб-сайтлар орқали P2P ўтказмаларини амалга ошириш эса тақиқланади.

Фойдаланувчи аккаунтига бошқа қурилмадан кирилганда ёки парол тикланганда биометрик идентификация талаб этилади. Бунда аккаунтга бириктирилган банк карталари автоматик равишда вақтинча нофаол ҳолатга ўтказилади.

Шунингдек, қурилмада зарарли дастур ёки масофадан бошқариш ҳолати аниқланса, банк ва тўлов ташкилотлари мижозни PUSH ҳамда SMS-хабар орқали огоҳлантириши керак.

Янги талаблар қарор расмий эълон қилинган кундан уч ой ўтгач кучга киради.