Индонезияда 39 ёшли аёл кучли зилзила вақтида шошилинч кесарево кесиш амалиёти орқали қиз фарзандли бўлди. Шифохонада электр таъминоти узилгани сабабли шифокорлар операцияни машъалалар ёруғида ўтказишга мажбур бўлган.

Мария Флорида Ного Келен ҳомиладорликнинг еттинчи ойида бўлган. Туғруққа ҳали икки ой қолганига қарамай, она ва боланинг ҳаётига хавф туғилгани учун шифокорлар зудлик билан операция қилишга қарор қилган.

Ҳодиса 15 август куни Шарқий Нуса-Тенгара провинциясида магнитудаси 7,7 балл бўлган кучли зилзила содир бўлган пайтда юз берган. Мария эпицентрга яқин Нагекео ҳудудидаги шифохонада бўлган.

Зилзила давом этаётган бир вақтда дунёга келган қизчанинг вазни 1,3 килограмм бўлган. У оиладаги тўртинчи фарзанд бўлиб, унга индонез тилида «зилзила» маъносини англатувчи «гемпа» сўзидан олинган Гемпита исми берилган.

Чақалоқ инкубаторга жойлаштирилган ва унинг аҳволи барқарор деб баҳоланган. Марияда туғруқдан кейин қон кетиши кузатилган, аммо шифокорлар унинг ҳаётини сақлаб қолишга муваффақ бўлган.

Зилзила пайтида шифохонанинг бир қисми ҳам қулаб тушганига қарамай, шифокорлар беморга тиббий ёрдам кўрсатишни давом эттирган. Бу ҳақда The Independent хабар берди.