АҚШда мамлакатнинг энг кекса маҳбуси сифатида танилган Френсис Клиффорд Смит 101 ёшида вафот этди.

Смит 1950 йилда яхта клубида тунги қоровулни ўлдиришда айбдор деб топилиб, ўлим жазосига ҳукм қилинган эди. Бироқ у умрининг охиригача жиноятга алоқаси борлигини рад этиб келди. Иш бўйича яна бир гумонланувчи тергов билан келишувга бориб, Смитга қарши кўрсатма берган.

Вақт ўтиши билан Смитнинг айбдорлигига ҳуқуқ-тартибот органлари ходимларининг ўзлари ҳам шубҳа қила бошлаган. Бир нечта гувоҳ аввал берган кўрсатмаларидан воз кечган, яна бир маҳбус эса қотилликни ўз зиммасига олган. Полиция ҳатто Смит воқеа жойида бўлмаган бўлиши мумкинлигини ҳам истисно этмаган.

Шу сабабли уни қатл этиш учун белгиланган сана саккиз марта кечиктирилган. Ниҳоят, 1954 йилда унга тайинланган ўлим жазоси умрбод қамоқ жазосига алмаштирилди.

Смит қамоқда жами 70 йил ўтказган. 2020 йилда у кекса маҳбуслар учун мўлжалланган махсус парвариш муассасасига кўчирилган.

«BBC News» хабарига кўра, Смит муассасада уйқусида, табиий сабабларга кўра вафот этган. Кейинчалик унинг жасади кремация қилинган.