Ўзбекистон миллий терма жамоаси ва Озарбайжоннинг «Сабаҳ» клуби ярим ҳимоячиси Умарали Раҳмоналиев фаолиятини Франция чемпионатида давом эттириши мумкин. ASnews.kz хабарига кўра, Франциянинг «Ланс» клуби 23 ёшли футболчига қизиқиш билдирмоқда.

Раҳмоналиевнинг трансфер қиймати ҳозирда 1,2 миллион евро атрофида баҳоланмоқда.

Футболчи 2026/27 йилги Чемпионлар лигаси саралаш босқичида «Сабаҳ» таркибида 7 та учрашувда майдонга тушиб, барчасини асосий таркибда бошлаган. У бу ўйинларда битта голли узатма амалга оширган.

Раҳмоналиев Ўзбекистон миллий терма жамоасидаги дебютини 2026 йил март ойида Габонга қарши ФИФА серияси доирасидаги учрашувда ўтказган.

Айни пайтда «Сабаҳ» Чемпионлар лигаси саралаш босқичи плей-оффининг иккинчи учрашувида Исроилнинг «Ҳапоэль Беэр-Шева» клубига қарши баҳс олиб боради. Жамоалар ўртасидаги биринчи ўйинда Озарбайжон клуби 1:2 ҳисобида мағлуб бўлган.

Раҳмоналиев «Бунёдкор» академияси тарбияланувчиси ҳисобланади. У профессионал фаолиятининг асосий қисмини Россиянинг «Рубин» клубида ўтказган. Футболчи Қозон клуби сафида Россия Премьер-лигасидаги дебютини 2023 йил 22 июль куни «Локомотив»га қарши учрашувда ўтказган.

2025 йил январь ойида Раҳмоналиев «Сабаҳ»га ижара асосида ўтган. 2026 йил январь ойида эса Озарбайжон клуби футболчининг трансферини тўлиқ сотиб олган.

Раҳмоналиев «Рубин» билан 2022/23 йилги мавсумда Россия Биринчи лигасида чемпион бўлган. «Сабаҳ» билан эса 2024/25 йилги мавсумда Озарбайжон Кубогини қўлга киритган.

Қайд этиш жоиз, Ўзбекистон миллий терма жамоасининг яна бир футболчиси Абдуқодир Ҳусанов ҳам «Ланс» сафида тўп сурган. Кейинчалик у Англиянинг «Манчестер Сити» клубига трансфер қилинган.