АҚШ федерал суди ҳалокатга учраган «Титаник» кемаси қолдиқларидан олиб чиқилган 100 дан ортиқ артефактни аукционда сотишни вақтинча тақиқлади.

Савдога қўйилиши режалаштирилган буюмлар орасида кема йўловчиларининг шахсий буюмлари, пул белгилари, ошхона жиҳозлари ва интерьерга оид предметлар бор.

Аукционга АҚШнинг Океан ва атмосфера тадқиқотлари миллий бошқармаси (NOAA) қарши чиққан. Идора ҳамда маданий меросни муҳофаза қилиш ташкилотлари артефактларнинг тақдири юзасидан хавотир билдирган.

Судья коллекциядаги барча буюмларнинг батафсил рўйхатини, шунингдек, уларнинг ҳолати ҳақидаги маълумотларни тақдим этишни ҳам талаб қилди. Бу ҳақда The Washington Post хабар берди.

Аввалроқ артефактларни сотиш орқали кейинги тадқиқотларни молиялаштириш ва молиявий муаммоларни ҳал қилиш режалаштирилган эди. Бироқ бундай ташаббуслар АҚШ судлари, маданий меросни муҳофаза қилиш ташкилотлари ҳамда ҳалок бўлганларнинг қариндошлари томонидан бир неча бор қаршиликка учраган.

«Титаник» 1912 йилда Атлантика океанида айсберг билан тўқнашиб, чўкиб кетган. Унинг қолдиқлари 1985 йилда топилган.