Трамп маъмурияти визалар бериш тартибини янада қатъийлаштириб, келажакда АҚШ давлат ёрдамига муҳтож бўлиб қолиши мумкин, деб баҳоланган аризачиларнинг мамлакатга киришини чеклашни режалаштирмоқда. Бу ҳақда АҚШ Давлат департаменти вакили маълум қилди.

Унинг айтишича, янги тартиб август ойи бошида АҚШнинг барча элчихона ва консулликларида жорий этилган. Шу муносабат билан виза суҳбатлари жадвали «чуқурлаштирилган тайёргарлик» ўтказиш учун қайта кўриб чиқилган. Суҳбати аввалдан белгиланган айрим аризачиларга учрашуви бекор қилингани, янги сана ва вақт кейинроқ маълум қилиниши ҳақида электрон хат юборилган.

Расмийларнинг таъкидлашича, янги ёндашув АҚШга келган шахсларнинг кейинчалик давлат ижтимоий ёрдамига муҳтож бўлиб қолишининг олдини олишга қаратилган.