АҚШ президенти Дональд Трампнинг сочлари одатдагидан анча тўқроқ кўринаётган суратлари ижтимоий тармоқларда қизғин муҳокама қилинмоқда.

Жума куни Нью-Жерси штатининг Морристаун аэропортида олинган кадрларда Трамп самолёт зинапоясидан тушаётгани акс этган. Унинг ташқи кўринишидаги ўзгариш, айниқса, сочларининг тўқроқ ранги интернет фойдаланувчиларининг эътиборини тортган.

Айрим фойдаланувчилар Трампнинг янги қиёфасини кино қаҳрамонлари, жумладан, Пирс Броснан ижро этган Жеймс Бонд образига қиёслаган. Бироқ янги кўринишга муносабатлар турлича бўлган.

Журналист Яшар Али ҳам суратларга эътибор қаратиб, «Янги соч турмаги??? Агар бу суратларни Getty Images’дан ўзим олмаганимда, ишонмаган бўлардим», дея ёзган.

Трампнинг соч турмагига бўлган эътибор унинг аввалги қарорларидан бири билан ҳам боғлиқ. The Independent нашрининг ёзишича, АҚШ президенти Барак Обама даврида жорий этилган сув истеъмолига оид айрим чекловларни бекор қилган.

Трамп бу қарорни изоҳлар экан, душ бошларидан сув оқишини чекловчи меъёрлар сочига керакли ҳажм ва шакл беришни қийинлаштиришини айтган. Унинг таъкидлашича, янги меъёр душ бошидан бир дақиқада қарийб 10 литргача сув оқишига имкон беради.