Аҳолига суюлтирилган газ етказиб бериш тизимини қайта ташкил этиш мақсадида «Ҳудудгазтаъминот» таъсисчилигида «LPG-Trade» МЧЖни ташкил этиш таклиф қилинмоқда.

Янги тузилма суюлтирилган газни биржа орқали харид қилиб, белгиланган тартибда аҳолига етказиб беради.

Шу орқали суюлтирилган газнинг чакана нархини белгилашда иқтисодий асосланган механизмлар жорий этилади. Ижтимоий ҳимояга муҳтож аҳоли қатламларига эса харид қилинган суюлтирилган газнинг ҳар бир килограмми учун компенсация тўланиши белгиланмоқда.

Бунда давлат бюджетидан ажратиладиган маблағлар умумий субсидия ўрнига аниқ истеъмолчига йўналтирилади. Бу эҳтиёжманд оилаларни манзилли қўллаб-қувватлаш имконини беради.

Шунингдек, ижтимоий соҳа объектларига суюлтирилган газни биржа нархларида етказиб бериш, аҳолига белгиланган нархда сотиш натижасида юзага келадиган тафовутни эса республика бюджети ҳисобидан қоплаш тартиби ҳам кўзда тутилмоқда.